មន្ត្រីនគរបាលឆ្មាំគុកវៀតណាមម្នាក់ ចូលប្លន់ហាងមាសក្នុងផ្សារហើយបោះមាសចោលនៅលើផ្លូវ ដោយស្រែកថា ទុកសម្រាប់ឱ្យអ្នកក្រ
វៀតណាម៖ បុរសម្នាក់ក្នុងឯកសណ្ឋានជាមន្ត្រីនគរបាល បានឆ្មក់ចូលប្លន់ហាងមាសពីរកន្លែង ស្ថិតនៅភាគកណ្តាលប្រទេសវៀតណាមកាលពីថ្ងៃអាទិត្យ (ទី៣១ ខែកក្កដា) រួចក៏បានគប់មាសដែលប្លន់បាននោះទៅលើដងផ្លូវ ក្រោយមកត្រូវបានគេកំណត់អត្តសញ្ញាណថាជាឆ្មាំគុក។
ឆ្មាំគុកខាងលើបានយកកាំភ្លើងប្រភេទ AK47 មួយដើមសំដៅទៅកាន់ហាងលក់មាស ស្ថិតនៅផ្សារដុងបា វេលាម៉ោង១២:៣០នាទីថ្ងៃត្រង់ ថ្ងៃអាទិត្យ ដោយបានគំរាមបុគ្គលិក និងបានបាញ់ទៅលើកញ្ចក់ដែលដាក់តាំងមាស។
យោងតាមសាក្សីហាង និងអ្នកផ្សារក្នុងហេតុការណ៍ខាងលើ បានអះអាងថា មន្ត្រីឆ្មាំគុកខាងលើ បានយកវត្ថុមានតម្លៃដែលប្លន់បានគ្រវែងចោលទៅលើដងផ្លូវដោយស្រែកថា មាសទាំងនេះសម្រាប់អ្នកក្រ។
ហេតុការណ៍ដ៏រន្ធត់នេះបានកើតឡើងប្រហែលជា ១០នាទី មុនបុរសបង្កហេតុខាងលើចាកចេញពីកន្លែងកើតហេតុខាងលើ និងបានបន្តកាន់កាំភ្លើងជាប់ខ្លួន។
ក្រោយពេលបុរសខាងលើនេះចាកចេញពីកន្លែងកើតហេតុ មនុស្សម្នាជាច្រើនប្រញាប់ទៅកន្លែងកើតហេតុដើម្បីប្រមូលយកមាស។
លុះដល់ម៉ោង២រសៀល ជនសង្ស័យបានទម្លាក់កាំភ្លើងនិងប្រគល់ខ្លួនឱ្យសមត្ថកិច្ច។ ស្របពេលជាមួយគ្នានោះដែរ សមត្ថកិច្ចស្នើសុំឱ្យអ្នកដែលបានប្រមូលមាសនោះយកមាសត្រឡប់មកវិញ ដោយសមត្ថកិច្ចកំពុងកំណត់អត្តសញ្ញាណអ្នកដែលប្រមូលយកមាស តាមរយៈខ្សែអាត់វីដេអូមួយដែលគេថតបានដោយសន្តិសុខផ្សារ និងកាម៉េរាសុវត្ថិភាពនៅតាមដងផ្លូវ៕ ប្រភព៖ https://www.cnc.com.kh/detail/news/32464
