ខេត្តក្រចេះ ៖ បុរសវ័យចំណាស់ម្នាក់ ខ្លួនមួយជិះទូក២ មានប្រពន្ធដល់ទៅ២នាក់ និងព្យាយាមសម្របសម្រួល ឱ្ យវេញជាធ្លុងមួយដែរ តែចុះសម្រុងគ្នាមិនកើតសោះ លុះបុរសជាប្តីចង់ដឹកស្រូវយកទៅឱ្យប្រពន្ធចុង ស្រាប់តែ ប្រពន្ធដើម ឃាត់
មិនឱ្យដឹកទៅដាច់ខាត ជាហេតុធ្វើឱ្យ កើតមានជំលោះតឹងសរសៃកដាក់គ្នា រហូតធ្វើឱ្យបុរសជាប្តី ឆេះឆួលកំហឹងខ្លាំងទប់មិនជាប់ ក៏ស្ទុះទាញពូថៅកាប់ប្រពន្ធដើមរបស់ខ្លួន១ពូថៅចំ កញ្ចឹងក បណ្តាលឱ្យដួលផ្កាប់មុខចូល ភ្នក់ភ្លើង ស្លាប់យ៉ាងអាណោចអាធ័ម ទីបំផុត ក៏ត្រូវសមត្ថកិច្ចចាប់វាយខ្នោះនាំយកទៅចាត់ការតាមច្បាប់។
ករណីអំពើឃាតកម្មដ៏សាហាវព្រៃផ្សៃ ប្តីកាប់ប្រពន្ធដាច់កស្លាប់ខាងលើនេះ បានកើតឡើង កាលពីយប់ថ្ងៃទី២៦ ខែកក្កដា ឆ្នាំ២០២២ នៅចំណុចមុខខ្ទមស្រែមួយកន្លែង ស្ថិតក្នុងភូមិថ្មគ្រែកណ្តាល ឃុំថ្មគ្រែ ស្រុកចិត្របុរី។
បន្ទាប់មក នៅថ្ងៃទី២៧ ខែកក្កដា ឆ្នាំ២០២២ ក្រោយពី សមត្ថកិច្ចជំនាញចុះស្រាវជ្រាវយ៉ាងយកចិត្តទុកដាក់ ទើបឈានដល់ការចាប់ឃាត់ខ្លួន ជន សង្ស័យជាប្តីនាំយកទៅសាកសួរ។
ជនដៃដល់ជាឃាតករកាប់ប្រពន្ធរបស់ខ្លួនដាច់ក ដែលត្រូវសមត្ថកិច្ចចាប់ឃាត់ខ្លួន មានឈ្មោះមាន ឈាងនី អាយុ៥៦ឆ្នាំ មុខរបរ កសិករ។ ចំណែកស្ត្រីរងគ្រោះជាប្រពន្ធ មានឈ្មោះក្តាន់ យេម អាយុ៦២ឆ្នាំ មុខរបរកសិករ ត្រូវប្តីកាប់១ពូថៅចំត្រង់កញ្ចឹងកខាងឆ្វេង (ស្លាប់)។ ប្តីប្រពន្ធអ្នកទាំងពីរ មានលំនៅក្នុងភូមិថ្មគ្រែកណ្តាល ឃុំថ្មគ្រែ ស្រុកចិត្របុរី។
តាមប្រភពពីសមត្ថកិច្ចខេត្តក្រចេះ បានឱ្យដឹងថា កម្លាំងនគរបាលជំនាញព្រហ្មទណ្ឌខេត្ត និងស្រុកចិត្របុរី ក្រោមការចង្អុលណែនាំពី លោកឧត្តមសេនីយ៍ទោ លន់ សុផាត ស្នងការនគរបាលខេត្ត បានចុះបំបែកសំណុំរឿងអំពើឃាតកម្មមួយ
ដែលបានកើតឡើងនៅភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ក្រោយចុះស្រាវជ្រាវបានរយៈពេលមួយថ្ងៃ។ ដោយក្នុងនោះនគរបាលជំនាញព្រហ្មទណ្ឌ នៅថ្ងៃទី២៧ ខែកក្កដា ឆ្នាំ២០២២ បានសម្រេចចាប់ឃាត់ខ្លួនជនសង្ស័យដៃដល់ម្នាក់ជាប្តីឈ្មោះមាន ឈាងនី នាំយកទៅសាកសួរ។
នៅចំពោះមុខសមត្ថកិច្ច ជនសង្ស័យជាឃាតករ និងត្រូវ ជាប្តីរបស់ស្ត្រីរងគ្រោះ បានឆ្លើយសារភាពថា ខ្លួនពិតជាបានកាប់ប្រពន្ធ បណ្តាលឱ្យស្លាប់ប្រាកដមែន។
ជនសង្ស័យជាឃាតកររូបនេះ បានបន្តសារភាពថា តាមពិត រូបគាត់មានប្រពន្ធចំនួន២នាក់ ដោយស្ត្រីរងគ្រោះខាងលើ គឺជាប្រពន្ធដើម ចំណែកប្រពន្ធចុងម្នាក់ទៀតរស់នៅភូមិផ្សេង។ កន្លងមក គាត់ធ្លាប់ព្យាយាមសម្របសម្រួលឱ្យប្រពន្ធទាំងពីរត្រូវរ៉ូវគ្នាវេញគ្នាជាធ្លុងមួយដែរ តែហាក់ មិនបានផលសោះ ដោយសារម្នាក់ៗមានចិត្តប្រកាន់រៀងខ្លួន។
ជនសង្ស័យ បានសារភាពទៀតថា លុះមកដល់ថ្ងៃកើតហេតុ កាលពីយប់ថ្ងៃទី២៦ ខែកក្កដា ឆ្នាំ២០២២ គាត់បានរៀបចំដឹកស្រូវយក ទៅឱ្យប្រពន្ធចុងនៅឯផ្ទះ ប៉ុន្តែប្រពន្ធដើមរបស់គាត់បានឃើញ បាវស្រូវនៅលើគោយន្ត ក៏សួរនាំថាយកស្រូវទៅណា
ពេលនោះ គាត់ក៏ប្រាប់ប្រពន្ធ ដើមតាមត្រង់ថា ដឹកស្រូវទៅផ្ទះប្រពន្ធចុង ស្រាប់តែប្រពន្ធដើមឡាំប៉ា មិនព្រមឱ្យគាត់យកស្រូវទៅឱ្យប្រពន្ធចុងដាច់ខាត ជាហេតុធ្វើឱ្យពួកគាត់ ទាំងពីរនាក់ក៏បានកើតមានជំលោះពាក្យសម្តីតឹងសរសៃកដាក់គ្នាមួយប៉្រាវ រហូតដល់គាត់ខឹងខ្លាំងពេកទ្រាំមិនបាន ក៏ទាញពូថៅកាប់ទៅលើស្ត្រី រងគ្រោះជាប្រពន្ឋដើម ចំកញ្ចឹងកខាងឆ្វេង បណ្តាលឱ្យដួលផ្កាប់មុខទៅនឹងភ្នក់ភ្លើងស្លាប់នៅនឹងកន្លែង (មុខខ្ទមស្រែ) តែម្តង។
បន្ទាប់ពីទទួលបានចម្លើយសារភាពរបស់ជនសង្ស័យរួចមក សមត្ថកិច្ចជំនាញ បានរៀបចំកសាងសំណុំរឿងបញ្ផូនទៅកាន់សាលាដំបូង ខេត្ត ដើម្បីចាត់ការបន្តតាមនីតិវិធី។
ដោយឡែកសាកសពស្ត្រីរងគ្រោះ ត្រូវបានសមត្ថកិច្ចប្រគល់ទៅឱ្យក្រុមគ្រួសារ រៀបចំធ្វើបុណ្យតាមប្រពៃណី៕
